Korporata Energjetike e Kosovës (KEK) ka njoftuar se Njësia A4 është ndalur në mënyrë të kontrolluar më 11 gusht 2026, në orën 00:00. Ky veprim është ndërmarrë pas konstatimit të një rrjedhjeje të gazit të hidrogjenit (H₂) në gjenerator, përkatësisht në afërsi të kushinetës nr. 7.
Sipas njoftimit zyrtar, kjo ndërhyrje është kryer si masë parandaluese për të siguruar standardet e sigurisë teknike dhe për të krijuar kushtet e nevojshme për inspektimin e pajisjeve. Ekipet profesionale janë angazhuar menjëherë për të vlerësuar gjendjen teknike, për të identifikuar shkakun e saktë të rrjedhjes dhe për të ndërmarrë veprimet e duhura për eliminimin e problemit.
KEK ka bërë të ditur se kthimi i Njësisë A4 në procesin e prodhimit të energjisë do të realizohet vetëm pasi të jenë përfunduar të gjitha kontrollet dhe ndërhyrjet e nevojshme, si dhe të vërtetohet se janë plotësuar kushtet për operim të sigurt. Për çdo zhvillim të mëtejshëm lidhur me kohën e rikthimit në funksion, korporata do të njoftojë publikun përmes kanaleve zyrtare.