Korporata Energjetike e Kosovës (KEK) ka njoftuar se njësia A4 e Termocentralit Kosova A është ndalur në mënyrë të kontrolluar nga operimi, për shkak të rrjedhjeve të ujit në kaldajë, konkretisht në zonën e tejnxehësit.
Stafi profesional i Termocentralit e ka vlerësuar ndalimin si të domosdoshëm dhe në përputhje me standardet teknike dhe të sigurisë, për të parandaluar dëmtime më të mëdha dhe të paparashikueshme në pajisje. Kjo ndërhyrje ruajti integritetin teknik të njësisë dhe sigurinë e operimit.
Një pjesë e konsiderueshme e kapaciteteve të munguara të energjisë po sigurohet nga Shqipëria. Falë bashkëpunimit të vazhdueshëm ndërmjet KEK-ut dhe Korporatës Energjetike Shqiptare (KESH), kapaciteti mungues plotësohet përmes shkëmbimit të energjisë elektrike, duke kontribuar në ruajtjen e stabilitetit të furnizimit me energji.
Sipas KEK-ut, aktualisht funksionon vetëm një njësi nga gjithsej pesë. Tre njësi të tjera – B1, B2 dhe A5 – ndodhen në remont të rregullt dhe në proces rehabilitimi e modernizimi, sipas Bilancit Vjetor Energjetik. Këto ndërhyrje janë të planifikuara për të rritur besueshmërinë dhe performancën afatgjate.
Ekipet profesionale janë në gatishmëri. Sapo të krijohen kushtet teknike pas ftohjes së njësisë, do të identifikohet burimi i saktë i rrjedhjeve dhe do të nisë procesi i sanimit për rikthimin e njësisë A4 në operim në afatin më të shkurtër të mundshëm.