Korporata Energjetike e Kosovës (KEK) ka njoftuar se në Termocentralin Kosova A është evidentuar një ndërprerje e përkohshme në funksionimin e elektrofiltrave. Ngjarja ndodhi më 25 prill 2026.
Sipas njoftimit zyrtar, defekti u shkaktua nga një ndërprerje në qarkun elektrik të ndërprerësve të kompresorëve të ajrit me automatizëm, e cila çoi në ndaljen automatike të operimit të elektrofiltrave.
Menjëherë pas evidentimit, ekipet teknike kanë ndërmarrë veprimet e nevojshme për identifikimin e shkakut. Aktualisht zhvillohen ndërhyrjet për sanimin e defektit dhe rikthimin e funksionalitetit të plotë të sistemit.
KEK po zbaton masa intensive parandaluese për mbrojtjen e aseteve të tjera teknike dhe minimizimin e çdo rreziku potencial për sistemin. Korporata thekson përkushtimin ndaj menaxhimit profesional, transparencës dhe rikthimit sa më të shpejtë në operim normal, në përputhje me standardet teknike dhe mjedisore.
Lexues të Koha.net kanë dërguar fotografi që tregojnë tym më të pazakontë nga zona e Obiliqit të shtunën në mëngjes. Sivjet parashihet projekti i modernizimit të turbinave, ndërsa në Termocentralin Kosova B1 është nisur ndërrimi i elektrofiltrave.