Një biznes privat, konkretisht një pikë karburanti në qytetin e Peshkopisë, është bërë shënjestër e një kërcënimi serioz gjatë ditës së premte. Autori i ka dërguar pronarit të subjektit një pako, të fshehur brenda një kutie picash, e cila përmbante një sasi lënde eksplozive dhe një letër kërcënuese. Në mesazh kërkohej pagesa e 50 milionë lekëve brenda një afati prej 2 orësh, me paralajmërimin se në të kundërt biznesi do të hidhej në erë.
Ngjarja është regjistruar në afërsi të Spitalit të Dibrës. Pas konstatimit të pakos, forcat e Policisë kanë rrethuar perimetrin e sigurisë për rreth tre orë për të shmangur rrezikun ndaj qytetarëve. Specialistët e çminimit dhe neutralizimit të lëndëve shpërthyese kanë mbërritur nga Tirana për të kryer verifikimet e nevojshme. Si masë paraprake, qarkullimi i mjeteve është devijuar përmes unazës së qytetit, ndërsa subjektet tregtare përreth zonës janë mbyllur përkohësisht.
Në kuadër të hetimeve, Policia ka analizuar pamjet e kamerave të sigurisë të bizneseve në zonë. Bazuar në këto veprime, autoritetet kanë bërë të mundur identifikimin e autorit të dyshuar, shtetasit Zija Shulku. Ndërkohë, vijon puna për zbardhjen e plotë të rrethanave dhe kapjen e tij.