Mbrëmjen e djeshme, në fshatin Vrinë të Bashkisë Konispol, është parandaluar një atentat me lëndë eksplozive ndaj shtetasit Mirash Gjikola, 57 vjeç. Ngjarja ka ndodhur në vendin e quajtur Kthesa e Vrinës, në aksin rrugor Shëndëlli–Vrinë.
Sipas informacioneve zyrtare, Gjikola ka njoftuar Komisariatin e Policisë Sarandë se, teksa lëvizte me automjetin e tij, ka dëgjuar zhurma të pazakonta. Pas ndalimit, ai ka konstatuar praninë e një sasie lënde të dyshuar eksplozive në sediljen e pasme të mjetit tip Nissan me targa AA 725 LG.
Menjëherë janë nisur forca të shumta policie në vendngjarje. Më pas janë përfshirë ekspertë të krimeve të rënda nga Drejtoria Vendore e Policisë Vlorë dhe reparti anti-eksploziv i RENEA-s. Ekspertët kanë punuar për neutralizimin e lëndës, ndërsa zona është rrethuar.
Disa burime raportojnë se shpërthimi dyshohet të aktivizohej me telekomandë. Gjikola rezulton me precedentë penalë, i dënuar më parë, por ka deklaruar se nuk është i përfshirë në konflikte. Policia ka nisur hetimet për zbardhjen e rrethanave dhe identifikimin e autorëve.