Mbrëmjen e 5 shkurtit 2026, në vendin e quajtur Kthesa e Vrinës, në aksin Shëndëlli-Vrinë, në Vrinë të Bashkisë Konispol, u parandalua një shpërthim i telekomanduar me lëndë eksplozive në një automjet.
Mirash Gjikola, 57 vjeç, drejtuesi i mjetit tip Nissan me targa AA 725 LG, dëgjoi zhurmë të pazakontë gjatë lëvizjes, ndaloi dhe konstatoi një lëndë të dyshuar eksplozive në sediljen e pasme. Menjëherë njoftoi Komisariatin e Policisë Sarandë.
Në vendngjarje mbërritën forca të shumta policie, ekspertë të krimeve të rënda nga Drejtoria Vendore e Policisë Vlorë, si dhe reparti anti-eksploziv i RENEA-s, të cilët çaktivizuan lëndën shpërthyese.
Mirash Gjikola ka precedent penal: është dënuar më herët me 8 vite burg për tentativë vrasjeje. Ai është zhvendosur prej kohësh nga Lezha dhe jetonte në Shëndëlli, pranë Konispolit.
Policia ka shpallur në kërkim shtetasin Dedë Gjin-in, i cili dyshohet si person i përfshirë në vendosjen e eksplozivit. Hetimet vazhdojnë për zbardhjen e rrethanave, motivit të ngjarjes dhe identifikimin e personave të tjerë të mundshëm.
Autoritetet nuk përjashtojnë pistën e hakmarrjes ose konfliktit të mëparshëm, duke marrë parasysh të kaluarën kriminale të 57-vjeçarit. Masat e sigurisë në zonë janë shtuar.