Këshilli i Ministrave të Shqipërisë miratoi në 10 prill 2026 vendimin për ngritjen e Këshillit të Mbështetjes së Projekteve, i cili do të funksionojë pranë Autoritetit të Mbikëqyrjes së Lojërave të Fatit. Ky vendim përcakton kushtet, kërkesat dhe procedurat për shqyrtimin, vlerësimin dhe financimin e projekteve në fushën e lojërave të fatit.
Këshilli kryesohet nga zëvendëskryeministrja Albana Koçiu. Në përbërjen e tij janë:
- Ministri përgjegjës për financat;
- Ministri përgjegjës për sportin;
- Ministri përgjegjës për kulturën;
- Ministri përgjegjës për inovacionin;
- Ministri përgjegjës për çështjet sociale;
- Titullari i autoritetit përgjegjës për qeverisjen elektronike.
Projektet përzgjidhen përmes një procesi konkurrues dhe transparent. Afati minimal për aplikim është 30 ditë, ndërsa vlerësimi bazohet në kriteret e transparencës dhe kapaciteteve për zbatim. Subjekti fitues mban përgjegjësi të plotë për zbatimin dhe raportimin.
Financimi jepet me këste:
- 20% e shumës së miratuar pas miratimit të propozimit;
- 50% pas dorëzimit dhe miratimit të raportit të monitorimit të performancës;
- 30% pas miratimit të raportit final.
Raportet e monitorimit dorëzohen në fund të çdo faze financimi, por jo më vonë se çdo 6 muaj. Në rast moszbatimi, fondet kthehen. Këshilli ushtron kontroll dhe monitorim të vazhdueshëm.