Ministria e Financave ka propozuar krijimin e Këshillit Fiskal të Republikës së Shqipërisë, një institucion i ri publik me status të pavarur. Sipas nismës, e cila ka marrë mbështetjen e Bankës Botërore, ky këshill do të ketë për mision vlerësimin e politikave fiskale, monitorimin e borxhit publik dhe sigurimin e qëndrueshmërisë financiare.
Sipas projektligjit, institucioni do të ushtrojë detyrat në mënyrë të pavarur nga çdo ndikim i institucioneve publike ose subjekteve private. Detyrat kryesore do të përfshijnë:
• Vlerësimin e Kuadrit Makroekonomik dhe Fiskal.
• Kontrollin e projektbuxhetit vjetor dhe raportit të zbatimit të tij.
• Monitorimin e respektimit të rregullave fiskale në përputhje me Ligjin Organik të Buxhetit.
Struktura dhe organizimi
Institucioni do të përbëhet nga 3 anëtarë me kohë të plotë, të cilët do të zgjidhen nga Kuvendi pas një procedure publike konkurrimi. Kriteret për anëtarësim parashikojnë të paktën 10 vite përvojë profesionale në financa publike, makroekonomi ose kërkim shkencor, si dhe ndalimin e ushtrimit të funksioneve politike apo punësimit në administratën publike gjatë 2 viteve të fundit.
Për sa i përket trajtimit financiar, kryetari do të paguhet sa një ministër, ndërsa anëtarët e tjerë do të përfitojnë 85% të kësaj page. Në rast se rekomandimet e Këshillit Fiskal nuk merren parasysh nga qeveria, Ministria e Financave do të detyrohet të hartojë një relacion shpjegues që do të bëhet publik dhe do t'i dërgohet Kuvendit.
Kjo nismë synon të adresojë nevojën për një vlerësim objektiv të politikave ekonomike, duke rritur besueshmërinë e financave shtetërore në përputhje me standardet e Bashkimit Evropian.
Përditësime
Qeveria ka përcaktuar koston për krijimin e Këshillit Fiskal, e cila kap vlerën e 39 milionë lekëve. Ky institucion i pavarur do të financohet tërësisht nga buxheti i shtetit.
Ministri i Financave, Petrit Malaj, konfirmoi krijimin e Këshillit Fiskal si institucion me statusin e personit juridik. Sipas projektligjit, opinioni i këtij organi do të jetë i detyrueshëm për t'u bashkëlidhur dokumenteve buxhetore që i përcillen Kuvendit. Me këtë nismë, Shqipëria synon të forcojë transparencën buxhetore dhe të pozicionohet si lider rajonal në këtë fushë.