Këshilli i Ministrave ka miratuar projektligjin "Për Këshillin Fiskal të Republikës së Shqipërisë", një institucion i ri me karakter monitorues dhe këshillimor. Këshilli do të operojë si person juridik publik, i pavarur nga ekzekutivi, dhe do t’i raportojë Kuvendit të Shqipërisë. Detyra kryesore e tij është mbikëqyrja e disiplinës fiskale, transparencës dhe qëndrueshmërisë së financave publike, në përputhje me standardet ndërkombëtare dhe ato të Bashkimit Evropian.
Institucioni nuk do të ushtrojë funksione ekzekutive dhe nuk do të hartojë politika buxhetore. Ai do të vlerësojë projektbuxhetin vjetor, kuadrin makroekonomik dhe fiskal afatmesëm, si dhe zbatimin e rregullave fiskale. Në rast se Këshilli jep vërejtje negative, Ministria e Financave është e detyruar të paraqesë një relacion shpjegues për arsyet e devijimeve. Institucioni do të ketë të drejtë të kërkojë informacion nga institucionet publike dhe do të publikojë analizat dhe opinionet e tij.
Struktura e Këshillit do të përbëhet nga tre anëtarë me mandat gjashtëvjeçar, të cilët do të zgjidhen nga Kuvendi me shumicën e votave të deputetëve. Për të garantuar rotacionin, mandatet e përbërjes së parë do të jenë përkatësisht gjashtë, pesë dhe katër vjet. Kandidatët duhet të kenë përvojë profesionale të paktën 10-vjeçare në fusha si financat publike, makroekonomia ose kërkimi shkencor, si dhe të mos kenë ushtruar funksione politike apo të mos kenë qenë pjesë e administratës publike dy vitet para emërimit. Këshilli do të mbështetet nga një sekretariat teknik me pesë punonjës.
Buxheti i shtetit do të financojë funksionimin e institucionit, me një kosto totale të parashikuar prej 39 milionë lekësh. Nga kjo shumë, 32 milionë lekë janë dedikuar për pagat e anëtarëve dhe sekretariatit, 5 milionë lekë për shpenzime operative dhe 2 milionë lekë për shpenzime kapitale. Ligji pritet të hyjë në fuqi 15 ditë pas botimit në Fletoren Zyrtare.