Këshilli i Ministrave ka miratuar vendimin “Për përcaktimin e tabelave dhe simboleve në pikat e kalimit kufitar dhe zonat e verifikimit kufitar”, në zbatim të legjislacionit të ri për kontrollin e kufirit shtetëror. Ky akt synon krijimin e një sistemi të unifikuar informacioni për të gjitha pikat hyrëse dhe dalëse të vendit.
Sipas vendimit, sinjalistika e re do të vendoset në porte, aeroporte dhe në akset rrugore që të çojnë drejt pikave kufitare tokësore. Tabelat do të jenë dygjuhëshe, në shqip dhe anglisht, për të lehtësuar qarkullimin e udhëtarëve. Në pikat kufitare me orar të kufizuar, do të instalohen tabela shtesë që do të pasqyrojnë oraret zyrtare të funksionimit.
Një aspekt qendror i kësaj reforme është organizimi i korsive të kalimit. Autoritetet do të përcaktojnë korsi të dedikuara bazuar në kategoritë e udhëtarëve, siç janë:
• Persona që i nënshtrohen verifikimit minimal;
• Shtetas të huaj pa nevojë vize ose me leje qëndrimi/vizë afatgjatë;
• Kategoritë e tjera të udhëtarëve.
Në pikat portuale dhe tokësore, do të ketë korsi të veçanta për mjetet e transportit, duke përfshirë autoveturat, autobusët dhe kamionët, në varësi të nevojave operacionale. Gjithashtu, në aeroportet dhe portet detare do të identifikohen qartë zonat e tranzitit.
Ky vendim shfuqizon aktin normativ nr. 729, të datës 20 tetor 2016. Për zbatimin e standardeve të reja janë ngarkuar operatorët e aeroporteve, autoritetet portuale, Autoriteti Rrugor Shqiptar, si dhe Ministria e Financave dhe Ministria e Punëve të Brendshme.