Lideri i Koresë së Veriut, Kim Jong Un, deklaroi se lufta e SHBA-së ndaj Iranit vërteton vendimin e vendit të tij për të zhvilluar armë bërthamore.
Në një fjalim të mbajtur përpara Asamblesë së Lartë Popullore, ai akuzoi Uashingtonin për "akte terrorizmi dhe agresioni të sponsorizuar nga shteti". "Situata aktuale e tregon qartë se Koreja e Veriut kishte të drejtë të refuzonte presionin me fjalë të ëmbla të SHBA-së për të hequr dorë nga arsenali bërthamor. Tashmë, statusi nuklear i vendit tonë është i pakthyeshëm", u shpreh Kim Jong Un.
Ai theksoi se vendet pa armë atomike janë të ekspozuara ndaj fuqisë ushtarake amerikane, duke iu referuar konfliktit me Iranin. Më parë, Donald Trump kishte deklaruar se Irani paraqiste një kërcënim "të menjëhershëm" për SHBA-në, pavarësisht pohimit të tij disa muaj më parë se Amerika i kishte "shkatërruar" kapacitetet bërthamore të Republikës Islamike.
Deklarata e Kim Jong Un-it vjen në një moment kur, sipas CNN-së, Trump ka sinjalizuar së fundi gatishmërinë për të rinisur bisedimet me liderin koreano-verior, duke rivendosur një rrugë diplomatike të mbyllur në 2019.