Analisti Kim Mehmeti, me origjinë nga Maqedonia e Veriut, i është drejtuar me një mesazh mbështetës pjesëmarrësve në protestën e 11-të që po zhvillohet në Tiranë. Tubimi kundërshton ndërtimin e një resorti luksoz në Zvërnec dhe kërkon llogaridhënie nga qeveria. Mesazhi i Mehmetit u përcjell publikut nga gazetari Klevin Muka.
Në fjalën e tij, Mehmeti vlerëson angazhimin e brezit të ri, duke e cilësuar zërin e tyre si një burim shprese për mbarë shqiptarët. Ai shton se të rinjtë kanë të drejtë të kërkojnë përgjegjësi nga brezat e mëparshëm për gjendjen e vendit.
"Mos tregoni që maskarenjtë të tregojnë se kush jeni. I përulem zërit tuaj, i cili është ilaçi më i mirë i shpresës mbarëshqiptare. Jeni duke bërë atë që nuk e bëmë dot ne patriotët e studiove televizive. Mos u dorëzoni, sepse nëse ju jeni kundër zhvillimit, vendimin do ta marrin ata që e vodhën vendin për 35 vite apo mediat që u lëpihen oligarkëve? Shqipëria më shumë ju takon ju sesa ne që nuk e mbrojtëm dot nga hajdutët dhe zhvatësit. Ju jeni heronjtë e mi", u shpreh Mehmeti në mesazhin e tij.