Pas përfundimit të protestës gjithëpopullore të organizuar në Prishtinë në mbështetje të ish-krerëve të UÇK-së, ka reaguar Klestor Veseli, djali i ish-kryetarit të Kuvendit, Kadri Veseli. Në një prononcim për mediat, ai ka theksuar se familjet dhe mbështetësit e ish-krerëve të UÇK-së ruajnë besimin te bota perëndimore dhe sistemin e saj të drejtësisë.
Sipas Klestor Veselit, kërkesa e tyre drejtuar instancave përkatëse lidhet me nevojën për të korrigjuar atë që ai e cilësoi si një gabim të zhytur në politikë. Protesta u organizua nga organizatat e dala nga lufta, si pasojë e zhvillimeve lidhur me vendimin e shkallës së parë të Gjykatës Speciale në Hagë. Ish-kryetari i Kuvendit, Kadri Veseli, është dënuar në shkallë të parë me 18 vjet burgim për akuza të ndryshme, ndërkohë që akuza për krime kundër njerëzimit është hedhur poshtë.