Në natën e shtatë të protestave në sheshin "Skënderbeu" në Prishtinë, të organizuara për të kundërshtuar verdiktin e Gjykatës Speciale ndaj ish-krerëve të UÇK-së, ishte e pranishme edhe Violeta Veseli, bashkëshortja e Kadri Veselit. Ish-kryetari i PDK-së, Kadri Veseli, është dënuar nga kjo gjykatë me 18 vjet burgim. Në total, katër ish-krerët e UÇK-së janë dënuar me 81 vjet burgim, ku Hashim Thaçi dhe Jakup Krasniqi u dënuan me nga 25 vjet, ndërsa Rexhep Selimi me 13 vjet.
Violeta Veseli falënderoi qytetarët për përkrahjen ndaj familjes së saj. Ajo theksoi se zgjodhi të qëndronte mes protestuesve dhe jo në pjesën e përparme të turmës, duke shprehur mirënjohje për pjesëmarrjen e tyre të vazhdueshme. Lidhur me gjendjen e bashkëshortit të saj, ajo pohoi se ai është mirë dhe e ndjek situatën përmes mediave.
Në lidhje me ftesën e ushtrueses së detyrës së presidentes, Albulena Haxhiu, drejtuar familjeve të Hashim Thaçit, Kadri Veselit, Jakup Krasniqit dhe Rexhep Selimit për një takim të përbashkët, Violeta Veseli konfirmoi se ftesa është pranuar, duke shtuar se për detaje të tjera do të shihet në vijim.