Këshilli i Lartë Gjyqësor ka vendosur të kërkojë asistencë ndërkombëtare për të reduktuar stokun e dosjeve në sistemin gjyqësor, i cili ka kaluar mbi 150 mijë çështje të pashqyrtuara.
Për këtë qëllim pritet të mbërrijë në Shqipëri eksperti serb Dimitrije Sujeranoviç, i cili ka qenë i angazhuar më parë në projekte të ngjashme në gjykatat e Selanikut dhe Athinës.
Përveç ndërhyrjeve ligjore që parashikojnë gjykim më të shpejtë dhe shmangien e trupave gjykuese me tre gjyqtarë, KLGJ propozon edhe përdorimin më të gjerë të proceseve online dhe shmangien e disa procedurave të gjata.
Përfaqësues të avokatëve shprehen skeptikë ndaj kësaj qasjeje. Avokatja Gëzime Buçi thekson se zgjidhja nuk qëndron te një ekspert i huaj, por te plotësimi i sistemit me gjyqtarë dhe prokurorë. Avokatja Jilldiz Kastrati shton se vendi ka mjaftueshëm avokatë dhe juristë vendas.
Ngarkesa mbetet e lartë. Në shkallët e para një gjyqtar trajton mesatarisht rreth 1 mijë dosje, ndërsa vetëm në Apelin e Juridiksionit të Përgjithshëm stoku ka arritur në 55 mijë çështje të pazgjidhura.