Një auditim i Kontrollit të Lartë të Shtetit (KLSH) në Inspektoratin Kombëtar të Mbrojtjes së Territorit (IKMT) ka identifikuar mungesë koordinimi mes institucioneve, që ka lejuar ndërtime të kundërligjshme në zona bregdetare, muzeore dhe të mbrojtura. Auditimi mbulon periudhën 2020-2024 dhe u publikua më 16 mars 2026.
Sipas raportit të KLSH-së, sinjalizimet për ndërhyrje të paligjshme nuk kanë munguar, por IKMT i ka deleguar rastet në drejtoritë rajonale ose institucione të tjera për mungesë kompetence, duke mos reaguar. Edhe kur janë konstatuar shkelje dhe janë kërkuar prishje ndërtimesh, këto masa janë zvarritur dhe nuk janë ekzekutuar.
Raporti thekson se "IKMT nuk është angazhuar për kryerjen e inspektimeve të nevojshme, për të garantuar mbrojtjen e territorit nga ndërtimet e kundërligjshme në zona ose objekte me rëndësi kombëtar, pas sinjalizimeve të ardhura nga institucionet e tjera publike". Këto institucione përfshijnë Institutin Kombëtar të Trashëgimisë Kulturore (IKTK), Drejtoriatët Rajonale të Trashëgimisë Kulturore (DRTK), Agjencinë Kombëtare të Bregdetit (AKB) dhe Agjencinë Kombëtare të Zonave të Mbrojtura (AKZM).
Për vitin 2020, KLSH evidenton:
- 4 raste të sinjalizuara nga AKB për punime në zona bregdetare;
- 4 raste nga AKZM për punime në zona të mbrojtura;
- 5 raste nga IKTK/DRTK për punime në zona muzeore dhe monumente kulture.
Në asnjë rast IKMT nuk ka verifikuar situatën në vend me grupe pune të përbashkëta dhe nuk ka zbatuar procedurat ligjore pas konstatimit të shkeljeve. Kjo ka çuar në rritjen e ndërtimeve të tilla.