Inspektorati Kombëtar i Mbrojtjes së Territorit (IKMT) zhvilloi një takim në zonën e Golemit dhe Qerretit për respektimin e detyrimeve ligjore në sigurimin teknik të kantierëve të ndërtimit. Kryeinspektori Afrim Qendro, i shoqëruar nga kryetari i Bashkisë së Kavajës Fisnik Qosja, u takua me sipërmarrësit që zhvillojnë aktivitet në këtë zonë.
Aktualisht zhvillohen 55 leje ndërtimi. Nga kontrolli i parë i IKMT-së, rezultoi se vetëm dy objekte janë në përputhje me kriteret ligjore, ndërsa pjesa tjetër vlerësohet si keq ose shumë keq. Qendro u kërkoi sipërmarrësve të marrin masa të menjëhershme, duke theksuar se dëmtimi i turizmit nga këto kantierë është e pafalshme dhe se përputhja me ligjin është e mundur, siç tregojnë dy rastet pozitive.
Ai nënvizoi rëndësinë e harmonisë me banorët e përhershëm dhe turistët në Golem, Qerret e Kavajë, ku jetojnë qindra mijëra banorë. Qendro kritikoi edhe performancën e Inspektoratit të Mbrojtjes së Territorit të Bashkisë së Kavajës, duke i thënë drejtorit se mungesa e kontrollit lokal ka çuar në nevojën për ndërhyrje qendrore.
Kryeinspektori njoftua se javën e ardhshme do të nisë rikontrolli në të gjitha kantieret. Në rast mospërmbushjeje të detyrimeve të sigurisë teknike, do të merren masa të ashpra sipas ligjit, pa tolerim për askënd. Qosja falënderoi IKMT-në për angazhimin në prag të sezonit turistik dhe u bëri thirrje bizneseve të reagojnë.