Inspektorati Kombëtar i Mbrojtjes së Territorit (IKMT) vazhdon inspektimet në kantiere ndërtimi në të gjithë territorin, me fokus të veçantë në Bashkinë e Tiranës, për shkak të numrit të lartë të lejeve në zbatim.
Gjatë fazës së dytë të rikontrollit në Tiranë, deri të premten e kaluar, janë kryer riverifikime në 132 objekte ndërtimi. Në këto objekte është vlerësuar shkalla e përmbushjes së detyrimeve të vendosura gjatë kontrollit fillestar.
Në 22 raste u konstatua mungesë reflektimi, moszbatim i masave të kërkuara dhe mospërputhje me kërkesat ligjore. IKMT ka proceduar këto subjekte në përputhje me dispozitat e legjislacionit në fuqi, i cili përcakton ndëshkimin me gjobë, masa e së cilës varet nga natyra e shkeljes së konstatuar.
Procesi i kontrollit zhvillohet në bashkëpunim me IMT-të vendore dhe AZHT-në. Qëllimi është garantimi i përputhshmërisë me standardet e sigurisë dhe kërkesat ligjore në fushën e ndërtimit në të gjithë territorin.