Inspektorati Kombëtar i Mbrojtjes së Territorit (IKMT) ka ndërmarrë masa administrative ndaj subjektit “Polyeco Albania” Sh.p.k., duke vendosur gjobë dhe pezullim të përkohshëm të aktivitetit të menaxhimit të mbetjeve. Vendimi vjen pas një kontrolli të detajuar të ushtruar nga Drejtoria e Inspektimit të Mjedisit dhe Ujërave pranë këtij institucioni.
Sipas njoftimit zyrtar, subjekti ishte paralajmëruar më herët në përputhje me ligjin, por gjurmimi i mëtejshëm i rrugës së mbetjeve dëshmoi shkelje të përsëritura. Ndër problemet kryesore të konstatuara janë:
• Klasifikimi i pasaktë i mbetjeve, ku materiale të deklaruara si “karbon aktiv” (absorbentë me substanca të rrezikshme) nuk përputheshin me natyrën e tyre reale.
• Mospërputhje midis kodeve të mbetjeve të regjistruara ose të transferuara dhe listës së kodeve të përcaktuara në kontratat me subjektin pritës.
• Ushtrimi i veprimtarisë në shkelje të lejeve apo autorizimeve përkatëse, duke përfshirë administrimin e mbetjeve që nuk përfshiheshin në autorizimin e aktivitetit të kompanisë.
Masat administrative janë bazuar në Ligjin Nr. 57/2025 “Për menaxhimin e integruar të mbetjeve” dhe Ligjin Nr. 99/2024 “Për inspektimin në RSH”. Pezullimi i aktivitetit të “Polyeco Albania” do të mbetet në fuqi deri në eliminimin e plotë të shkeljeve të konstatuara dhe garantimin e përputhshmërisë me kushtet ligjore të ushtrimit të aktivitetit.