Emisioni Vetting ka evidentuar raportin e Kontrollit të Lartë të Shtetit (KLSH) të shkurtit 2009, i cili zbardh shkelje ligjore në ndarjen e tokave në Komunën Lukovë, në fshatrat Borsh, Piqeras dhe Shën Vasil, gjatë viteve 2006-2007. Procesi i kalimit të pronësisë nga ish-kooperativat te familjet private u shoqërua me manipulime, ku vetëm në fshatin Borsh u konstatuan mbi 443 mijë metra katrorë tokë të dhëna në kundërshtim me ligjin.
Diana Bilali ka përmendur raportin e KLSH-së në çështjen e saj, duke thënë se zona është trajtuar në mënyrë të gabuar nga institucionet publike. Ajo deklaron: "Në fakt, ka disa procese gjyqësore që lidhen me këtë tokë. Janë disa çështje në gjykatë për të njëjtën pronë dhe kjo tregon qartë që problemi nuk është zgjidhur. Unë do të vazhdoj ta ndjek këtë çështje deri në fund, sepse është e drejta ime."
Raporti nxjerr shkelje si fryrja artificiale e numrit të anëtarëve për familje, llogaritja e gabuar e normës për frymë, përfshirja e trojeve brenda vijës së verdhë dhe dhënia e tokës për persona pa të drejtë përfitimi. KLSH-ja bëri përgjegjës zyrtarët e kadastrës së Sarandës dhe komisionet lokale që firmosën dokumentet.
Një rast konkret është ai i familjes së Tajar Balil Lalës, babait të drejtoreshës së Tatimeve Erilinda Lala. Familja u regjistrua me 5 frymë dhe përfitoi 10.500 metra katrorë tokë, duke tejkaluar me të paktën 500 metra katrorë normën ligjore të lejuar për atë zonë.
Çështja mbetet në proces gjyqësor. Pritet vendim përfundimtar nga Gjykata e Apelit të Juridiksionit të Përgjithshëm në Tiranë mbi konfliktin e pronësisë.