Emisioni TakFak riktheu të mërkurën investigimin e Vetting në News24, ku dokumentacion i zbuluar tregon indicie për fshehje pasurish nga drejtoresha e Tatimeve Rajonale Tiranë Erilinda Lala dhe bashkëshorti i saj Taulant Godroli.
Dokumentet e siguruara dhe korrespondenca me institucionet publike konstatojnë fshehje pasurish në raste si ai i kompanisë 2D Construction 2025, me pronare Marsida Dedej, e cila dyshohet se u shit fiktivisht atyre. Kjo kompani ka marrë leje për ndërtimin e një resorti në tokë publike nga Bashkia Kavajë pa garë. Po kështu përmendet hoteli në Borsh.
Më 29 maj 2025, Erilinda Lala u vendos në krye të Drejtorisë së Tatimeve Rajonale Tiranë në pozicion të komanduar.
Dyshimet shtrihen edhe në ndikimin e tyre në tendera. Kur Lala ishte juriste pranë Komisionit të Prokurimeve Publike (KPP), bashkëshorti Godroli punonte jurist në kompaninë Alko-Impex General Construction, me administrator A. A., gjatë përballjeve të kësaj kompanie në KPP ose Gjykatën Administrative.
Dokumentet publike dhe denoncimet ngrejnë dyshime për lidhjen midis Lala–Godroli dhe Alko-Impex, e cila ka përfituar kontrata publike me vlerë dhjetra miliona euro fonde publike, me paracaktim nga ish-zëvendëskryeministrja dhe ish-ministrja e Infrastrukturës dhe Energjisë Belinda Balluku.
Balluku mbetet nën mburojën e mazhorancës socialiste, e cila i ka mohuar Strukturës së Posaçme Kundër Korrupsionit dhe Krimit të Organizuar (SPAK) kërkesën për arrestimin e saj.