Emisioni investigativ Vetting në News24 ka publikuar dokumente dhe korrespondenca me institucionet publike, që japin indicie për shkelje të rënda nga Erilinda Lala, e emëruar drejtoreshë e Drejtorisë së Tatimeve Rajonale Tiranë më 29 maj 2025 në pozicion të komanduar. Midis tyre përmenden fshehja e pasurisë së bashku me bashkëshortin Taulant Godroli.
Dokumentet tregojnë lidhje të forta mes Lala-Godroli dhe kompanive Alko-Impex General Construction, me administrator Arbër Abazin, si dhe ALKO IMPEX CONSTRUCTION (ish KLEDOR ALBANIA-09). Këto dyshohen se kanë përfituar kontrata publike me vlerë në dhjetëra miliona euro.
Denoncimi i parë publik erdhi në maj 2016 nga Partia Demokratike, përmes ish-deputetes Grida Duma, e cila ngriti pyetje për lidhje midis përfaqësuesve ligjorë të kompanisë së Sadriut dhe funksionarëve të Komisionit të Prokurimeve Publike (KPP). Ajo pyeti nëse një drejtues i kompanisë së Sadriut ishte funksionar i lartë i KPP-së dhe nëse përfaqësuesi ligjor kishte lidhje me një funksionare të lartë të këtij komisioni.
Pas gati një dekade, dosja e kompanive hyri nën hetim nga SPAK, për dyshime se kanë përfituar fonde publike me paracaktim nga ish-zëvendëskryeministrja dhe ish-ministrja e Infrastrukturës dhe Energjisë, Belinda Balluku. Mazhoranca socialiste i mohoi SPAK-ut kërkesën për arrestimin e saj, duke kundërshtuar për herë të parë një vendim të Prokurorisë së Posaçme.