Emisioni investigativ Vetting ka zbardhur dyshime rreth lidhjeve të drejtoreshes aktuale të Drejtorisë Rajonale të Tatimeve Tiranë, Erilinda Lala, me kompaninë “2D Construction 2025”, ish-“Gea Construction”.
Më 16 dhjetor 2024, Lala i dha aksionet e saj brenda kësaj kompanie ortakes Marsida Dedej, me miratimin e bashkëshortit të saj, Taulant Godroli. Kompania u krijua më 8 qershor 2023 në kompleksin Usluga dhe fillimisht Lala dhe Dedej kishin nga 50% aksione secila.
Projekti i resortit në Qerret
Kompania ka përfituar leje ndërtimi për një resort me vlerë rreth 10 milionë euro, i parashikuar 200 metra larg bregdetit të Qerretit në Kavajë. Projekti realizohet në bashkëpunim me Agjencinë e Zhvillimit të Territorit dhe Bashkinë Kavajë, por bie ndesh me Dokumentin e Rishikimit të Planit të Përgjithshëm Vendor të Bashkisë Kavajë. Ky dokument përcakton kufizimet për zhvillimin urban, numrin e kateve, zonat për banim, turizëm apo hapësira publike.
Leja u dha nga Këshilli Kombëtar i Territorit (KKT), duke evidentuar një zinxhir shkeljesh që përfshin edhe institucione të tjera publike. Pavarësisht se kompania nuk ka deklaruar të ardhura dhe operon me humbje, Lala ka raportuar rreth 40 mijë euro të ardhura nga biznesi për vitin 2023, pa specifikuar burimin.
Dyshimet për fshehje pasurie
Sipas Vetting-ut, Lala dyshohet se ka fshehur pasurinë në deklarimet pranë Inspektoratit të Lartë të Deklarimit dhe Kontrollit të Pasurive dhe Konfliktit të Interesave (ILDKPKI), për të mos ekspozuar lidhjet me kompaninë. ILDKPKI-ja, e drejtuar nga Evgjeni Bashari, nuk ka dhënë koment deri në publikimin e materialit. Burimet përmendin gjithashtu lidhje të Godrolit me Arbër Abazin dhe Artan Sako.