Koalicioni VLEN ka reaguar ashpër ndaj glorifikimit të Ratko Mlladiqit, i dënuar për gjenocid dhe krime lufte, veprim ky i kryer nga anëtarë të Partisë Demokratike të Serbëve në Maqedoninë e Veriut. Në një reagim publik, VLEN e ka cilësuar këtë dukuri si cenim të rëndë të standardeve që duhet të përfaqësojë një zyrtar publik.
Sipas VLEN, shqetësimi bëhet edhe më i madh kur përmbajtje të tilla publikohen nga drejtues institucionesh, të cilët kanë për detyrë ligjore mbrojtjen e të drejtave të shqiptarëve dhe të komuniteteve të tjera. Në reagimin e koalicionit thuhet se çështja nuk ka të bëjë me bindje personale, por me vlerat që duhet të përcjellin institucionet shtetërore tek qytetarët. Për këtë arsye, VLEN ka kërkuar përgjegjësi të menjëhershme, duke vlerësuar se ata që nuk tregojnë respekt ndaj viktimave dhe vlerave të bashkëjetesës nuk mund të jenë garantues të të drejtave të komuniteteve.
Kjo ngjarje zhvillohet në një kontekst politik kompleks, pasi si VLEN ashtu edhe Partia Demokratike e Serbëve janë pjesë e koalicionit të gjerë qeverisës të udhëhequr nga VMRO-DPMNE e kryeministrit Hristijan Mickoski.