Kolektivi për Mendim dhe Veprim Feminist zhvilloi një aksion simbolik proteste me rastin e 1 Majit, Ditës së Punëtorëve, duke bllokuar rrugën te Katedralja. Sipas tyre, klasa punëtore punon për të ndërtuar një shtet që nuk u përket punëtorëve, por kapitalistëve në sektorin publik dhe privat.
Në reagimin e tyre, Kolektivi nënvizon se punëtorja dhe punëtori përballen me një jetë gjithnjë e më të pajetueshme. Ata kryejnë punë të shumëfishta, pa siguri sociale, me çmime të papërballueshme, shpërfillje nga shteti dhe shfrytëzim në sektorin privat e publik. Punëtorët jetojnë për të punuar për shefat dhe pushtetin politik.
Reagimi rendit probleme specifike:
- Gratë amvise mbeten të stërlodhura pa të ardhura bazë;
- Pensionistët marrin pensione të pamjaftueshme për barnat;
- Punëtorët në sektorin privat keqpaguhen, keqtrajtohen dhe vriten në vendin e punës;
- Personat e etnive të racializuara keqtrajtohen dhe përjashtohen;
- Gratë punëtore abuzohen seksualisht dhe shtypen shumëfish;
- Personat queer përjashtohen nga tregu i punës;
- Personat neurodivergjentë dhe me aftësi të kufizuara ose keqpërdoren, ose përdoren si mjet marketingu nga kapitali.
Sipas Kolektivit, këto vështirësitë lindin nga partneriteti i shtetit me kapitalin, që bashkëpunojnë për të shtypur dhe shpartalluar punëtorët. Kosova, e ndërtuar nga djersa punëtore, po kthehet në parajsë për pushtetarët dhe kapitalistët, dhe ferr për punëtorët. Frytet e punës shkojnë te një pakicë që grumbullon kapitalin përmes zullumit.