Gjenerallejtënant Bashkim Jashari, komandant i Forcës së Sigurisë së Kosovës (FSK), ka pritur në takim pjesëtarët e Njësisë së Kërkim-Shpëtimit të Regjimentit të Mbrojtjes Civile të Gardës Kombëtare të FSK-së. Këta pjesëtarë kanë qenë të angazhuar në operacionin humanitar të kërkim-shpëtimit në Klos të Republikës së Shqipërisë.
Gjatë takimit, Jashari i ka falënderuar pjesëtarët për angazhimin e tyre në këtë mision, duke vlerësuar profesionalizmin dhe përkushtimin e treguar në kushte të vështira dimërore. Ai i ka përgëzuar për përfundimin me sukses të operacionit dhe kontributin e dhënë në mbështetje të autoriteteve shqiptare.
Në kuadër të takimit, komandanti i FSK-së ka dekoruar pjesëtarët e angazhuar me medaljen "Shërbim Vetëmohues". Gjithashtu, njësisë përkatëse i është dhënë mirënjohje institucionale.
FSK ka ritheksuar përkushtimin për forcimin e bashkëpunimit rajonal dhe ngritjen e vazhdueshme të kapaciteteve profesionale. Forca ka dëshmuar gatishmëri për angazhim në misione humanitare brenda dhe jashtë territorit të Republikës së Kosovës.
Përditësime
Operacioni humanitar në Klos synonte gjetjen e trupit të pajetë të 30-vjeçarit Jurgen Karaj në Liqenin e Ulzës.