Forca e Sigurisë së Kosovës (FSK) ka gjetur trupin e pajetë të Jurgen Karaj, 30 vjeç, nga fshati Fullqet i Klosit, i cili ishte zhdukur në lumin Mat të Shqipërisë prej 29 ditësh.
Me kërkesë të autoriteteve të Republikës së Shqipërisë, FSK angazhoi një kontingjent të specializuar të Kërkim-Shpëtimit nga Regjimenti i Mbrojtjes Civile i Gardës Kombëtare. Operacioni u zhvillua në zonën e Klosit dhe zgjati dhjetë ditë, në bashkëpunim të ngushtë me autoritetet shqiptare.
Ekipet arritën të lokalizojnë trupin rreth 30 kilometra larg vendit të aksidentit, pas angazhimit intensiv në terren. Komandanti i FSK-së, Gjenerallejtënant Bashkim Jashari, shprehu ngushëllimet më të sinqerta për familjen dhe të afërmit e viktimës.
Në të njëjtën kohë, ai falënderoi personelin e angazhuar për përkushtimin, profesionalizmin dhe disiplinën e treguar gjatë këtij misioni humanitar. FSK theksoi përkushtimin e saj ndaj misioneve humanitare dhe forcimit të bashkëpunimit rajonal, në shërbim të jetës, sigurisë dhe mirëqenies së qytetarëve.