Pas një operacioni dy-ditor, ekipet e specializuara të Forcës së Sigurisë së Kosovës (FSK) kanë nxjerrë nga Liqeni i Batllavës trupin e pajetë të një 25-vjeçari. Ngjarja nisi të martën, kur rreth orës 13:00, u njoftua se një person kishte hyrë në ujë në një zonë që konsiderohet e rrezikshme për not dhe nuk kishte dalë më.
Në operacionin për gjetjen e viktimës u angazhuan ekipe të specializuara të kërkim-shpëtimit në ujëra të FSK-së, nën koordinimin e Qendrës së Situatave të Republikës së Kosovës. Përpjekjet në terren u zhvilluan në bashkëpunim të ngushtë me Policinë e Kosovës, strukturat komunale të Komunës së Podujevës dhe shoqatat e specializuara të kërkim-shpëtimit.
Pas nxjerrjes së trupit, autoritetet ndoqën procedurat standarde ligjore. Trupi i pajetë i është dorëzuar Institutit të Mjekësisë Ligjore dhe Policisë së Kosovës për hetimet e mëtejshme mbi rrethanat e ngjarjes.
Përditësime
Zëdhënësi i Policisë së Kosovës, Enis Pllana, ka bërë të ditur detaje lidhur me ngjarjen në Liqenin e Batllavës. Sipas hetimeve, 25-vjeçari kishte marrë një varkë me qira, ndërsa punonjësi i kompanisë deklaroi se viktima kishte refuzuar mbajtjen e jelekut të shpëtimit përpara nisjes.