Kombëtarja shqiptare e futbollit zhvilloi pasditen e djeshme seancën e fundit stërvitore në Tiranë, në prag të ndeshjes me Poloninë. Stërvitja u mbajt në Shtëpinë e Futbollit, ku trajneri Silvinjo drejtoi për herë të parë grupin e plotë të lojtarëve.
Në ditën e parë të grumbullimit, Gripshi, Ramadani dhe Uzuni kishin munguar. Uzuni dhe Gripshi nuk arritën në kohë për shkak të distancës dhe fluturimit, ndërsa Ramadani u bë baba në atë ditë dhe stafi teknik i dha leje për t'u bashkuar më vonë.
Për shkak të këtyre mungesave dhe formës fizike të grumbullimit fillestar, trajneri Silvinjo kishte ftuar lojtarë shtesë nga kampionati shqiptar, kryesisht nga Superiorja dhe Ledio Tresën nga Kategoria e Parë. Të gjithë këta lojtarë u larguan dje, duke lënë vetëm 26 futbollistët e listës zyrtare.
Gjendja fizike e lojtarëve është e mirë dhe nuk raportohet asnjë dëmtim apo problem lodhjeje në dy ditët e para. Kjo lejon stafin teknik të punojë me grupin e plotë gjatë përgatitjeve të fundit.
Axhenda e udhëtimit
Ditën e sotme, skuadra do të fluturojë drejt Varshavës, ku do të zhvillojë seancën e fundit stërvitore para ndeshjes. Kuqezinjtë do të vizitojnë stadiumin e takimit për t'u njohur me fushën, edhe pse disa lojtarë kanë luajtur aty në ndeshje të mëparshme.