Koalicioni i OJQ-ve për Mbrojtjen e Fëmijëve (KOMF) ka ngritur alarmin mbi raportimet nga terreni, të cilat dëshmojnë se fëmijët po përfshihen dhe po përdoren nga subjektet politike për të promovuar mesazhet dhe aktivitetet e tyre zgjedhore.
Në një reagim publik, KOMF thekson se një praktikë e tillë përbën shkelje të të drejtave të fëmijëve, cenon mirëqenien e tyre dhe nuk është në interesin e tyre më të mirë. Organizata u ka bërë thirrje të gjitha subjekteve politike që të respektojnë ligjin dhe të shmangin çdo formë të përfshirjes së të miturve në fushatë.
Masat e kërkuara nga KOMF:
• Komisioni Qendror i Zgjedhjeve (KQZ) duhet të monitorojë me rigorozitet aktivitetet e subjekteve politike.
• Sanksionet: Të ndërmerren masa ndaj të gjitha subjekteve që shkelin legjislacionin në fuqi gjatë përdorimit të fëmijëve.
• Apel prindërve: Të mos i ekspozojnë fëmijët në tubime, aktivitete promovuese apo ngjarje të tjera të organizuara nga partitë politike.
• Ftesë medias: Mediat duhet të monitorojnë respektimin e të drejtave të fëmijëve dhe të raportojnë rastet e shkeljeve, duke garantuar mbrojtjen e identitetit, privatësisë dhe dinjitetit të fëmijës.
KOMF mbetet e angazhuar për të garantuar mbrojtjen e të drejtave të fëmijëve gjatë gjithë procesit zgjedhor dhe u bën thirrje aktorëve shoqërorë që të jenë vigjilentë ndaj këtyre dukurive.