Opozita dhe mazhoranca kanë dakordësuar kalendarin e takimeve për reformën territoriale në Komisionin e Posaçëm parlamentar. Dakordësia erdhi pas debateve në mbledhjen e fundit dhe kërkesës së opozitës që dëgjesat të zhvillohen jo vetëm në terren, por edhe në Kuvend me praninë e kryetarëve të bashkive.
Bashkëkryetari i komisionit Arbjan Mazniku shpjegoi se dokumenti është punuar në mënyrë të përbashkët dhe përfshin dy kolona kryesore: dëgjesat në komision me kryetarët e bashkive sipas qarqeve dhe dëgjesat në terren. Ai theksoi se janë caktuar ditë specifike për dëgjesat në Kuvend, që të mos përplasen me seancat plenare. Kryetarët e bashkive të dy qarqeve do të dëgjohen në të njëjtën ditë.
Ky kalendar lejon përfundimin e dëgjesave për të gjitha qarqet brenda rreth 4-5 javësh. Komisioni ka vendosur të zhvillojë dy aktivitete në javë për ngjarjet publike më të mëdha, me mbështetjen e Bashkive të Forta për organizimin dhe logjistikën. Struktura e ngjashme zbatohet edhe për dëgjesat tematike, të cilat nisin më 1 maj në Kuvend.
Dëgjesa e parë zhvillohet më 3 prill me ministrin e Pushtetit Vendor Ervin Demo, duke hapur fazën e parë të konsultimeve. Gjithashtu, Komisioni i Posaçëm miratoi listën e ekspertëve.