Komisioni i Posaçëm Parlamentar për Reformën Administrativo-Territoriale nisi zyrtarisht fazën e parë të dëgjesave publike më 7 prill.
Në këtë mbledhje, ministri i Pushtetit Vendor, Ervin Demo, prezantoi të dhëna mbi arritjet dhe sfidat e reformës së vitit 2014, pas një dekade zbatimi.
Raportimi i tij u shoqërua me tone të ashpra nga anëtarët e opozitës, të cilët u fokusuan te numri i ri i bashkive në hartën territoriale të re dhe e cilësuan reformën aktuale si dështim të qeverisë.
Bashkëkryetari i komisionit, Arbjan Mazniku, ritheksoi rëndësinë e një procesi të strukturuar dhe transparent, të mbështetur në të dhëna konkrete dhe analiza profesionale. Ai deklaroi: «Le ta lehtësojmë komisionin me të dhëna dhe të ndërtojmë një formë përmes së cilës i marrim këto të dhëna. Grupet e ekspertëve duhet të mblidhen dhe të listojnë tipologjinë e dokumenteve, për t’i marrë të dhënat në mënyrë formale. Secili grup të identifikojë qartë informacionin që kërkon, duke garantuar një proces të hapur dhe të plotë».
Mazniku shtoi se besimi në rezultatin final lidhet drejtpërdrejt me cilësinë e procesit: «Besoj shumë tek procesi. Sa më i shëndetshëm të jetë ai, aq më shumë garanci kemi për një reformë të qëndrueshme dhe funksionale».
Ministri Demo paraqiti një analizë të detajuar mbi arritjet dhe problematikat e konstatuara gjatë viteve, duke theksuar nevojën për një qasje të re që reflekton zhvillimet demografike, ekonomike dhe territoriale të vendit.
Kalendari i punës, i dakordësuar nga të dyja palët, parashikon dëgjesa publike në të gjithë Shqipërinë, me pjesëmarrjen e qytetarëve, përfaqësuesve vendorë dhe ekspertëve.
Synimi i ndarjes së re territoriale është forcimi i pushtetit vendor, krijimi i bashkive më të afta për të ofruar shërbime cilësore, thithur investime të huaja më efikase dhe menaxhuar financa të qëndrueshme.