Komisioni për Nismat Qytetare, Bashkëpunimin dhe Mbikëqyrjen Institucionale zhvilloi vizita monitoruese në Drejtorinë e Përgjithshme të Burgjeve, Institucionin e Ekzekutimit të Vendimeve Penale nr. 313 në Tiranë dhe Drejtorinë e Përgjithshme të Shërbimit të Provës. Vizitat u zhvilluan në kuadër të kalendarit vjetor të mbikëqyrjes parlamentare për vitin 2026.
Në fokus ishin politika penale, masat e sigurisë, dënimet alternative dhe mbipopullimi në burgje, si dhe kontrolli parlamentar mbi zbatimin e ligjeve. Komisioni shqyrtoi zbatimin e legjislacionit dhe funksionimin e strukturave përgjegjëse për ekzekutimin e vendimeve penale, si dhe problematikat që lidhen me këtë proces.
Gjatë takimeve u diskutua për përmbushjen e detyrimeve ligjore dhe institucionale, zbatimin e rekomandimeve të Kuvendit dhe Bashkimit Evropian, si dhe ecurinë e strategjive dhe planeve të veprimit. Vëmendje iu kushtua mbipopullimit në burgje dhe paraburgime, shpërndarjes së të paraburgosurve dhe të dënuarve sipas kapaciteteve të institucioneve, si dhe masave për përmirësimin e kushteve të trajtimit.
Në IEVP nr. 313, përfaqësuesit e komisionit u njohën me kushtet e akomodimit, gjendjen e infrastrukturës, higjienën dhe shërbimet bazë. Ata shqyrtuan gjithashtu mundësinë e marrjes së kujdesit shëndetësor e ndihmës juridike, si dhe mundësitë për kontakt me familjarët.
Diskutimet përfshinë nevojat për personel dhe investime, si dhe mundësitë për zhvillimin e veprimtarive arsimore e rehabilituese. U trajtua edhe bashkëpunimi ndërinstitucional për të shmangur vonesat në ekzekutimin e vendimeve penale dhe për të kufizuar kohëzgjatjen e qëndrimit në paraburgim.
Një tjetër temë ishte zbatimi i dënimeve alternative dhe roli i Shërbimit të Provës në mbikëqyrjen dhe mbështetjen e personave në komunitet. U diskutuan pengesat në nisjen dhe ndjekjen e ekzekutimit të këtyre dënimeve, kapacitetet e personelit, ngarkesa e punës dhe bashkëpunimi me gjykatat, prokuroritë e institucionet që ofrojnë shërbime mbështetëse.
Komisioni trajtoi gjithashtu administrimin dhe digjitalizimin e të dhënave, mbikëqyrjen elektronike dhe vlerësimin e rezultateve të programeve të rehabilitimit e riintegrimit, me synim parandalimin e përsëritjes së veprave penale. Informacioni i mbledhur do të shërbejë për vijimin e mbikëqyrjes parlamentare, përgatitjen e raporteve dhe hartimin e rekomandimeve për institucionet përgjegjëse, si dhe për garantimin e të drejtave të personave të privuar nga liria dhe të atyre nën mbikëqyrjen e Shërbimit të Provës.