Kuvendi i Shqipërisë zhvillon sot seancën plenare të radhës, ku vëmendja kryesore përqendrohet te projektligji "Për dhënie amnistie" dhe ndryshimet në Kodin Rrugor. Projektligji për amnistinë parashikon lirimin e menjëhershëm të personave që, deri më 31 dhjetor 2025, kanë qenë të dënuar me vendim të formës së prerë deri në 3 vite burg për burrat dhe 4 vite burg për gratë, ose u ka mbetur një pjesë e tillë e dënimit pa shlyer. Përveç lirimeve, rreth 3 mijë persona pritet të përfitojnë ulje të masës së dënimit.
Në seancë do të diskutohen edhe dy projektligje për ndryshimin dhe shtesat në Kodin Rrugor, ndërsa rendi i ditës përfshin një sërë interpelancash me ministra të kabinetit qeveritar:
- Interpelancë urgjente me ministren e Shëndetësisë dhe Mirëqenies Sociale, Evis Sala, kërkuar nga deputetët e opozitës për gjendjen në sistemin shëndetësor.
- Seancë pyetje-përgjigje me ministren Evis Sala, kërkuar nga deputeti Erald Kapri, mbi mungesën e analizave dhe ilaçeve në QSUT.
- Interpelancë me zëvendëskryeministren Albana Koçiu, kërkuar nga deputeti Erion Braçe, në lidhje me statusin e legalizimeve.
- Interpelancë me ministrin e Turizmit, Kulturës dhe Sportit, Blendi Gonxhja, kërkuar nga deputetja Ina Zhupa, për përgatitjet e sezonit turistik.
Gjithashtu, deputetët do të informohen mbi konkluzionet e Konferencës së 8-të Ndërqeveritare Shqipëri-Bashkimi Europian. Në vijim të punimeve, pritet shqyrtimi i projektligjeve për sektorin e energjisë elektrike, informacionin elektronik të transportit të mallrave dhe ndryshimet në ligjin për sigurimet shoqërore. Kuvendi do të votojë edhe për miratimin e Planit Strategjik të Kuvendit 2026-2030 dhe ngritjen e nënkomisioneve parlamentare.
Përditësime
Ministri Ferit Hoxha pritet të informojë deputetët mbi gjetjet e Konferencës së 8-të Ndërqeveritare Shqipëri-Bashkimi Europian. Grupi i punës për amnistinë penale po diskuton ndryshime teknike në afatet kufizuese të vendimeve gjyqësore që përfshihen në projektligj. Paralelisht, Kuvendi do të shqyrtojë tre projektligje të reja për Kodin Rrugor, të cilat përcaktojnë kornizën për qarkullimin e automjeteve elektrike dhe mjeteve alternative si monopatina.