Kuvendi i Shqipërisë mban sot, më 9 prill 2026, në orën 10:00, seancën e radhës plenare, sipas urdhrit nr. 23, datë 7 prill 2026, të kryetarit Niko Peleshi.
Seanca nis me miratimin e procesverbalit të mbledhjes së 2 prillit 2026 dhe njoftimet e rregullta.
Interpelanca dhe pyetje-përgjigje
Deputeti Erion Braçe ka kërkuar interpelancë me ministrin e Bujqësisë dhe Zhvillimit Rural Andis Salla, në mbështetje të nenit 80 të Kushtetutës dhe nenit 96 të Rregullores së Kuvendit. Kjo nismë lidhet me problematikat e sektorit të qumështit, nga prodhimi deri në treg, si dhe pakënaqësitë e blegtorëve për shpërndarjen e subvencioneve.
Më pas, deputetja Erisa Xhixho ka kërkuar seancë pyetje-përgjigje me ministrin e Arsimit Mirela Kumbaro, në bazë të nenit 80 të Kushtetutës dhe neneve 90-95 të Rregullores. Kërkesa trajton diferencat në trajtimin financiar të mbi 11 mijë punonjësve të arsimit.
Projektligje dhe vendime
Në rend dite përfshihen:
- Projektligji "Për një shtesë në ligjin nr. 9710, datë 10.4.2007, 'Për portet turistike në Republikën e Shqipërisë', i ndryshuar".
- Projektligji "Për disa shtesa dhe ndryshime në ligjin nr. 9917, datë 19.5.2008, 'Për parandalimin e pastrimit të parave dhe financimit të terrorizmit', të ndryshuar".
- Projektvendimi për zgjedhjen e një anëtari të Këshillit Mbikëqyrës të Bankës së Shqipërisë.
Komisione hetimore
Opozita ka kërkuar ngritjen e dy komisioneve hetimore:
- Për kontrollin e ligjshmërisë së veprimeve të Autoritetit Rrugor Shqiptar (ARRSH) në investimet e infrastrukturës rrugore.
- Për kontrollin e ligjshmërisë në funksionimin e Agjencisë Kombëtare të Shoqërisë së Informacionit (AKSHI), vlerësimin e sigurisë kibernetike, mbrojtjen e të dhënave të qytetarëve, analizën e rreziqeve për sigurinë kombëtare dhe detyrimet si anëtar i NATO-s.
Gjithashtu, parashihen diskutime për çështje jashtë rendit të ditës.
Përditësime
Kuvendi ka nisur seancën plenare. Niko Peleshi prezantoi rendin e ditës, duke konfirmuar:
- Komisionet hetimore për ARRSH dhe AKSHI si pika 7 dhe 8;
- Zgjedhjen e anëtarit të Bankës si pika 9;
- Diskutimet jashtë rendit të ditës si pika 10.