Seanca plenare e sotme e Kuvendit pritet të zhvillohet me debat politik të theksuar. Në rendin e ditës janë përfshirë nëntë interpelanca dhe një seancë pyetje-përgjigjesh me anëtarë të kabinetit qeveritar.
Dy interpelanca janë kërkuar me kryeministrin Edi Rama, njëra nga një grup deputetësh të Partisë Demokratike dhe tjetra nga deputetët Agron Shehaj dhe Erald Kapri të Partisë Mundësia. Partia Demokratike kërkon sqarime mbi zhvillimet demografike dhe largimin e shqiptarëve, ndërsa Partia Mundësia kërkon transparencë për ndryshimet në funksionimin e Drejtorisë së Shërbimeve Qeveritare.
Ministrja e Shëndetësisë dhe Mirëqenies Sociale Evis Sala do të përballet me dy interpelanca nga deputetët Saimir Korreshi dhe Erisa Xhixho, si dhe me një seancë pyetje-përgjigjesh të kërkuar nga Erald Kapri. Ministri i Infrastrukturës dhe Energjisë Enea Karakaçi do të përgjigjet ndaj dy interpelancave të iniciuara nga deputeti socialist Erion Braçe mbi cilësinë e materialeve të ndërtimit dhe projektin e kanalizimeve të Tiranës.
Interpelanca të tjera janë parashikuar me ministrin e Bujqësisë Andis Salla dhe ministrin e Brendshëm Besfort Lamallari, si dhe me ministrën e Arsimit Mirela Kumbaro. Kuvendi do të shqyrtojë gjithashtu ndryshimet në Rregulloren parlamentare, për të cilat mazhoranca dhe opozita kanë arritur kompromis.
Përditësime
Kryeministri Edi Rama shtyu interpelancat me të dhe me ministrin Besfort Lamallari për shkak të vizitës në Korenë e Jugut. Deputetja Ina Zhupa kërkoi interpelancë me ministrin Mirela Kumbaro. Seanca miratoi kalendarin e punimeve për periudhën 25 maj–12 qershor 2026 me 72 vota pro.