Komisioni për Buxhet dhe Financa i Kuvendit të Kosovës miratoi me 10 vota për, asnjë kundër dhe asnjë abstenim, kërkesën për të përfshirë buxhetin e Komunës së Prishtinës dhe të Shtimes në projektligjin për ndarjet buxhetore të vitit 2026. Ky vendim u mor në mbledhjen e komisionit të së martës, në të cilën po shqyrtohet projektligji që pritet të kalojë në lexim të dytë të premten në Kuvend.
Ministri i Financave, Hekuran Murati, deklaroi se Komuna e Prishtinës dhe ajo e Shtimes kanë përmbushur të gjitha procedurat e nevojshme, duke përfunduar miratimin dhe dorëzimin e buxheteve. "Ditën e djeshme e kam marrë buxhetin nga Komuna e Prishtinës", tha ai, duke theksuar se ministria do të sjellë tabelat e përditësuara si amandamente. Sa i përket Komunës së Zubin Potokut, Murati deklaroi se kjo komunë miratoi buxhetin në Kuvendin Komunal një ditë më parë, por nuk ka plotësuar ende procedurat pasuese, prandaj nuk u përfshi.
Reagimet në Komision
Deputeti i AAK-së, Daut Haradinaj, kërkoi sqarime për amandamentin që po votohej, duke përmendur propozimin e deputetit të LDK-së, Besian Mustafa, dhe kërkesën e Komunës së Prishtinës. Edhe Besian Mustafa konfirmoi se qëllimi ishte përfshirja e buxhetit të Prishtinës në tabelat e ligjit.
Deputetja e Listës Serbe, Verica Ceraniq, pretendoi se komunat me shumicë serbe po lihen anash. Murati e hodhi poshtë këtë, duke shpjeguar se mospërfshirja e Zubin Potokut lidhet vetëm me vonesën në procedura dhe se buxheti do të shtohet sapo të dorëzohet.
Zyrtarët e Ministrisë së Financave konfirmuan se komuna të tjera mund të përfshihen nëse plotësojnë kërkesat midis dy leximeve në Kuvend.
Përditësime
Përparim Rama, kryetari i Prishtinës, postoi në Facebook duke theksuar miratimin unanim si hap të rëndësishëm për stabilitetin financiar, investimet në infrastrukturë dhe projektet zhvillimore, dhe vlerësoi procesin e përmbyllur nga komuna.
Komisioni për Buxhet refuzoi rreth 80 amendamente të opozitës.
- Nuk miratoi kërkesën e Kuvendit për buxhet shtesë mbi 361 mijë euro për programin e deputetëve.
- Sekretari Arben Loshi shpjegoi se fondet shërbejnë për pagat kalimtare të deputetëve nga dy legjislatura.