Komisioni për Buxhet i Kuvendit miratoi buxhetin e komunës së Zubin Potokut për vitin 2026 në 27 mars 2026, me shtatë vota pro, zero kundër dhe pa abstenim.
Ministri i Financave, Hekuran Murati, prezantoi buxhetin gjatë mbledhjes së komisionit. Ai bëri të ditur se vlera totale e tij është rreth 3.6 milionë euro. Murati shpjegoi se buxheti nuk u miratua brenda afateve të parashikuara dhe nuk u përfshi në ligjin për ndarje buxhetore, por Ligji për Menaxhimin e Financave Publike parashikon një procedurë alternative.
Sipas kësaj procedure, buxheti i dërgohet Ministrisë së Financave, e cila e procedon përmes Qeverisë drejt Kuvendit për shqyrtim dhe miratim. Murati theksoi se buxheti respekton kufijtë dhe dispozitat ligjore, përveç vonesës në afat. Prandaj, Ministria rekomandon miratimin e tij për të shmangur probleme në planifikim dhe menaxhim financiar gjatë vitit.
Ai sqaroi se as Ministria e Financave, as komisioni nuk kanë të drejtë të ndryshojnë përmbajtjen e buxhetit. Komisioni e procedon dokumentin për vendimmarrje në Kuvend.