Komisioni parlamentar për Buxhet miratoi të mërkurën, më 4 mars 2026, planifikimin financiar të Radio Televizionit të Kosovës (RTK) për gjashtëmujorin e parë të vitit 2026. Buxheti i paraparë nga Qeveria e Kosovës është 4 milionë e 480 mijë euro.
Drejtori i financave në RTK, Gazmend Rexhepi, shpjegoi detajet. Të hyrat nga buxheti i Kosovës janë 4 milionë e 480 mijë euro, nga burimet vetanake 610 mijë euro dhe nga donacionet 8 mijë e 750 euro. Të hyrat e përgjithshme arrijnë 5 milionë e 98 mijë e 750 euro. Shpenzimet për pagat e personelit parashikohen 3 milionë e 786 mijë e 743 euro, që përbëjnë 85% të buxhetit të ndarë nga Qeveria.
Gjatë diskutimeve, anëtarët e Komisionit ngritën shqetësime për sfidat financiare të RTK-së gjatë vitit 2025, duke përfshirë vonesat në pagesën e pagave, borxhet e kaluara dhe rritjen e pagës minimale. Deputetët përmendën edhe çështje menaxhimi dhe largimin e disa punëtorëve. Drejtuesit e RTK-së u përgjigjën se kontratat janë trajtuar sipas ligjit dhe rregullativës së brendshme.
Hysen Hundozi, ushtruesi i detyrës së drejtorit të përgjithshëm, deklaroi se viti 2025 ka qenë sfidues për shkak të mosfunksionalitetit të bordit dhe të Kuvendit si themelues. Ai theksoi se RTK-ja u përball me dy momente kritike, ku u rrezikua pagesa e pagave të rregullta të punëtorëve, situatë e parë në historinë e institucionit. Hundozi përmendi gjithashtu borxhet e kaluara, kërcënimet nga përmbaruesit, rritjen e çmimeve nga operatorët ekonomikë dhe ngritjen e pagës minimale.