Komiteti për Politikë të Jashtme i Parlamentit Evropian (AFET) ka miratuar raportin vjetor për Kosovën, duke vlerësuar se viti 2025 ishte një vit i humbur, ndërsa situata mbetet sfiduese edhe për muajt e vitit 2026. Raportuesi për Kosovën, eurodeputeti Riho Terras, theksoi se ngërçi politik ka ndikim të drejtpërdrejtë në integrimin evropian të vendit.
Sipas dokumentit, paqëndrueshmëria politike rrezikon përfitimet financiare nga Plani i Rritjes së BE-së, i cili për periudhën 2024-2027 kap vlerën prej 6 miliardë eurosh për Ballkanin Perëndimor. Kosova është planifikuar të përfitojë 882 milionë euro, të ndara si:
• 253 milionë euro në formë grantesh
• 629 milionë euro në formë kredie
Nëse kriteret e dakorduara dhe reformat nuk përmbushen deri në fund të muajit qershor, Kosova përballet me rrezikun e humbjes së 68.8 milionë eurove. Kjo situatë vjen pas një periudhe 18-mujore të vështirë, gjatë së cilës vendi përjetoi dy palë zgjedhje parlamentare për shkak të pamundësisë për të formuar institucione. Më 7 qershor, Kosova do t’u drejtohet sërish kutive të votimit, pasi legjislatura e kaluar nuk arriti të zgjidhte presidentin e ri të vendit.
Përditësime
Ndonëse Kosova përfiton fondet më të larta për frymë në rajon, Komiteti për Politikë të Jashtme i Parlamentit Evropian ka paralajmëruar se ngërçi politik 18-mujor rrezikon seriozisht këto mjete financiare. Sipas ish-komandantit të forcave estoneze, Riho Terras, pasiviteti i shkaktuar nga ciklet zgjedhore të njëpasnjëshme mund të çojë në humbjen e këtyre përfitimeve ekonomike.