Deri në orët e fundit të afatit të përcaktuar nga Komisionit Evropian, autoritetet e Kosovës nuk kanë dorëzuar raportin mbi zbatimin e hapave reformues. Ky dokument është thelbësor për vlerësimin e reformave, procedurë nga e cila varet zhbllokimi i kësteve të rregullta të mjeteve financiare.
Zëdhënësi i Komisionit Evropian, Guillaume Mercier, konfirmoi se katër shtete të tjera të Ballkanit Perëndimor i kanë dorëzuar tashmë raportet e tyre. Përveç Kosovës, edhe Bosnje e Hercegovina nuk e ka përmbushur këtë detyrim; megjithatë, në Bruksel nuk pritet dorëzimi i një dokumenti nga ky shtet, pasi nuk është miratuar ende Agjenda e Reformave.
Sipas të dhënave zyrtare, vonesat e Kosovës janë pasojë e krizës institucionale të zgjatur gjatë vitit të kaluar dhe këtij viti, e cila ka pamundësuar miratimin e legjislacionit të nevojshëm. Për shkak të mosplotësimit të kushteve, vendi nuk ka marrë ende asnjë këst të rregullt, ndërsa vlerësohet se tashmë kanë humbur një pjesë e mjeteve për të cilat afati kishte skaduar në fund të muajit qershor.
Zyrtarët e Bashkimit Evropian, përfshirë drejtorin e Drejtorisë për Zgjerim, Jan Geert Koopman, shprehin shpresën se pas zgjedhjeve të mbajtura më 7 qershor, do të krijohet një dinamikë e re politike që do të përshpejtojë përmbushjen e reformave të mbetura pezull.