Pas tensioneve të regjistruara mes protestuesve dhe policisë në zonën e Zvërnecit, kompania Zvërnec South Adriatic Development reagoi përmes një deklarate zyrtare. Investitori hodhi poshtë akuzat, duke theksuar se projekti po zhvillohet në përputhje me legjislacionin shqiptar dhe në koordinim me institucionet përgjegjëse.
Sipas kompanisë, trualli ku planifikohet investimi është pronë private, e blerë përmes sistemit bankar dhe e pajisur me dokumentacion të rregullt. Zhvilluesit synojnë ta transformojnë Vlorën në një destinacion të rëndësishëm turistik në Detin Mesdhe.
Në lidhje me shqetësimet mjedisore, kompania bëri të ditur se prej dy vitesh ka angazhuar ekspertë ndërkombëtarë për studime mbi biodiversitetin, të cilat do të bëhen publike. Gjithashtu, investitori konfirmoi se janë lidhur marrëveshje me marka të njohura ndërkombëtare në fushën e hotelerisë dhe shërbimeve.
Kompania Zvërnec South Adriatic Development dënoi aktet e dhunës ndaj pronës private dhe paralajmëroi ndjekje ligjore ndaj çdo përpjekjeje për shantazh ose pengim të projektit. Në përfundim, ata shprehën keqardhje për, siç e quajtën, "abuzimin me ndjenjat e publikut" në rrjetet sociale dhe u zotuan se projekti do të sjellë ndikim të ndjeshëm ekonomik për të gjithë zonën dhe për Shqipërinë.
Përditësime
Policia e Vlorës ndërhyri në Zvërnec për të garantuar rendin gjatë protestave të banorëve. Në reagimin e saj, kompania sqaroi se rrethimi i zonës është hapi i parë i zbatimit të projektit. Përmes një deklarate, investitori garantoi respektimin e standardeve ligjore, duke iu referuar eksperiencës së mëparshme në tregun ndërkombëtar.