Pas incidentit të ndodhur në Zvërnec, ku një qytetar u dhunua gjatë një proteste jashtë perimetrit të një prone private, Policia e Shtetit ka vënë në pranga punonjësin e sigurisë që ushtroi forcë ndaj tij.
Kompania Zvërnec South Adriatic Development, përgjegjëse për projektin zhvillimor në këtë zonë, ka reaguar zyrtarisht duke u distancuar nga veprimet e punonjësit. Përmes një njoftimi, kompania ka bërë të ditur ndërprerjen e menjëhershme të marrëdhënies kontraktuale me shoqërinë e sigurisë, e cila ishte kontraktuar për të garantuar ruajtjen e zonës.
Në deklaratën e saj, investitori thekson se punonjësit nuk kishin pasur asnjë udhëzim për të vepruar në kundërshtim me ligjin ose për të cenuar të drejtat e qytetarëve. Kompania vlerëson se ndërhyrja ndaj një qytetari që po ushtronte të drejtën e tij të protestës jashtë kufirit të pronës është moralisht e papranueshme dhe penalisht e dënueshme.
Ndërkohë, kompania ka shprehur gatishmërinë për të bashkëpunuar me organet e rendit për zbardhjen e plotë të ngjarjes. Përfaqësuesit e Zvërnec South Adriatic Development theksuan se marrëdhënia me komunitetin mbetet thelbësore dhe paralajmëruan intensifikimin e përpjekjeve për komunikim me banorët në javët në vijim. Gjithashtu, kompania shprehu keqardhjen për faktin se ky incident po shfrytëzohet në rrjetet sociale për të nxitur pretendime të pabazuara mbi ndikimin e projektit në natyrë.
Përditësime
Kompania Zvërnec South Adriatic Development publikoi një deklaratë zyrtare lidhur me incidentin në Zvërnec, duke kërkuar falje për veprimet e punonjësit të saj ndaj një protestuesi. Shoqëria konfirmoi se personeli i sigurisë është i pajisur me licencat dhe autorizimet e nevojshme nga institucionet përkatëse për ushtrimin e detyrës.