Kompania Gener 2 reagoi ndaj pretendimeve në media dhe rrjete sociale për projektin turistik Blue Borgo, të zhvilluar nga shoqëria Aba Blue Borgo sh.p.k. në afërsi të Ranës së Hedhun, në zonën e Velipojës.
Projekti ka marrë leje ndërtimi përfundimtare në dhjetor 2025, pas ndjekjes së të gjitha procedurave ligjore, përfshirë dokumentacionin teknik, ligjor dhe mjedisor, si dhe dëgjesat publike me komunitetin lokal. Gener 2 thekson se nuk është cenuar asnjë e drejtë pronësie dhe nuk është shkelur interes i ligjshëm i palëve të treta.
Sipas kompanisë, procesi gjyqësor i përfolur, ku një banor fitoi në Apel për pronësi, nuk ka lidhje juridike apo faktike me perimetrin e projektit, siç tregohet nga harta ilustruese. Banorët protestojnë prej ditësh kundër ndërtimit.
Gener 2 shprehu shqetësim për tensionet në terren, ku punonjësit janë përballur me tentativa sulmesh. Siguria e tyre është prioritet absolut dhe çdo akt intimidimi duhet të trajtohet nga institucionet. Kompania falënderoi Policinë e Shtetit për profesionalizmin, që shmangu incidente më të rënda dhe garantoi rendin. Punimet vazhdojnë në kushte të vështira.