Banorët e fshatit Rrjoll në Velipojë të Shkodrës kanë vazhduar protestat kundër punimeve të resortit turistik Blue Borgo, të nisura prej një muaji. Ata pretendojnë se toka u takon atyre dhe se dokumentet e pronësisë janë falsifikuar, çështje kjo në proces gjyqësor.
Më 26 shkurt 2026, situata u përshkallëzua në përplasje fizike. Një punonjës i kompanisë private të sigurisë Breçani Security, i punësuar nga ndërtuesi Bashkim Ulaj për të mbrojtur kantonierin e kompanisë Gener 2, goditi me grusht një djalë të ri protestues, sipas pamjeve të publikuara. Kjo çoi në ndërhyrjen e policisë, e cila shoqëroi 6 banorë në komisariat, mes tyre një vajzë.
Në mbështetje të protestuesve mbërritën deputetët e Partisë Demokratike, Bardh Spahia dhe Luçiano Boçi.
Banorët akuzojnë Fatmir Shpellzaj, ish-drejtor i Kadastrës dhe eksponent të Partisë së Lirisë, për falsifikim dokumentesh për pronësinë e tokës ku po ndërtohet resorti. Një banore pretendoi se punonjës të Gener 2 vishnin uniforme shteti dhe kërkoi ndërhyrjen e ministres së Brendshme. Një tjetër banor tha se situata kërkon masa të forta për mbrojtjen e pronës.
Pak ditë më parë, Gjykata e Apelit të Juridiksionit të Përgjithshëm në Tiranë njohu të drejtën e pronësisë për familjen Malaj, konkretisht Nikollë Malaj, mbi 20.700 m² (rreth 2.1 hektarë) tokë në Rrjoll, kundër Agjencisë së Trajtimit të Pronave. Procesi gjyqësor ishte nisur në vitin 2018.
Projekti Blue Borgo, zhvilluar nga shoqëria ABA Blue Borgo me status investitori strategjik, shtrihet në 146 hektarë në zonën Baks-Rrjoll, dikur pjesë e peizazheve të mbrojtura. Parashikohet ndërtimi i 33 strukturave akomoduese me 3 deri në 10 kate mbi tokë dhe një kat nëntokë, brenda 60 muajsh. Punimet filluan në fillim të shkurtit pas marrjes së lejes.
Përditësime
- Dy banorë u lënduan në përplasjet me policinë dhe u dërguan në spital.
- Disa banorë u panë me duar të gjakosura gjatë përplasjeve.
Rrjoll – Protestat kundër resortit hyjnë në ditën e 25-të me lëndime pas tensioneve me policinë gjatë përpjekjes së banorëve për të hyrë në kantier.
Videot e dërguara nga banorët tregojnë incidentin.
Policia nuk ka dhënë ende njoftim zyrtar.