Banorët e fshatit Rrjoll në Velipojë protestuan sot kundër projektit për ndërtimin e një resorti luksoz në zonën e tyre.
Pas tubimit të mbajtur një ditë më parë para Kuvendit dhe Prokurorisë së Posaçme, ata u mblodhën sërish në Velipojë për të shprehur kundërshtimin ndaj këtij projekti.
Gjatë protestës, banorët u përplasën me forcat e policisë në përpjekje për të penguar punimet. Ata u ulën në rrugë dhe bllokuan automjetet e kompanisë, duke mos lejuar hyrjen e tyre në zonën e paraparë për ndërtimin.
Protestuesit thirrën slogane si “Punëtorë ju punëtorë ne, me gjak ju me gjak ne” dhe deklaruan se janë gati të japin jetën për tokën e të parëve. Njëri prej tyre tha: “Do të vdesim këtu për tokën tonë dhe të gjyshërve”.
Banorët e cilësuan tokën si trashëgimi familjare dhe paralajmëruan vazhdimin e protestave nëse projekti nuk pezullohet.