Banorët e zonës së Rrjollit në Shkodër vazhdojnë prej gati dy muajsh protestat kundër punimeve për resortin luksoz Blu Borgo, të nisura nga botuesi Bashkim Ulaj. Këtë të enjte, ata marshuan drejt kantierit në bregdetin e Velipojës, ku zhvillohen punimet për projektin turistik.
Forcat e policisë formuan një perimetër sigurie për të mbrojtur punëtorët dhe makinerinë. Situata u tensionua, duke çuar në përplasje mes protestuesve dhe efektivëve policorë. Disa banorë u shoqëruan në komisariat. Sipas tyre, policia i ka ofenduar me fjalë të papërshtatshme.
Protestuesit insistojnë se toka u përket atyre dhe nuk do ta lëshojnë. Ata deklaruan: “Është toka jonë, s’lejojmë të na e marrin. Malësorët e mbrojnë tokën me gjak”. Gjithashtu, i kanë kërkuar Fatmir Shpellzaj të paraqesë dokumentet e pronësisë, nëse i ka.
Një banore tha: “Kjo është toka jonë dhe nuk do të dorëzohemi. Policia na ka ofenduar. Kërkojmë vetëm drejtësi”. Një tjetër theksoi: “Rezistenca do të vijojë deri kur të kemi drejtësi. Nëse në Rrjoll ndodh një fatkeqësi, është faji i shtetit. Institucionet duhet të veprojnë”.
Punimet për Blu Borgo filluan në fillim të shkurtit, në një sipërfaqe prej 146 hektarësh, pas marrjes së lejes së ndërtimit. Projekti parashikon 33 struktura akomoduese dhe shërbimi, me objekte nga 3 deri në 10 kate mbi tokë dhe një kat nëntokë. Subjekti zhvillues është shoqëria ABA Blue Borgo, me statusin e investitorit strategjik.