Banorët e fshatit Rrjoll në Velipojë protestuan kundër ndërtimit të një resorti turistik në zonën e tyre. Ata u mblodhën herët në mëngjes për të bllokuar punonjësit dhe makineritë e kompanisë ndërtuese, çka çoi në përplasje me forcat e policisë.
Gjatë incidenteve, 6 persona, mes tyre një grua, u shoqëruan në Drejtorinë Vendore të Policisë Shkodër. Pas kësaj, banorët zhvendosën protestën para godinës së policisë, duke kërkuar lirimin e të shoqëruarve dhe mbrojtjen e pronave private nga ndërhyrja shtetërore.
Protestuesit theksuan se kjo është dita e 16-të e demonstratave të tyre. Një banore deklaroi: "Sot është dita e 16-të të protestojmë. Drejtësi prej shtetit. Na keni marrë gra, fëmijë, burra, na keni dhunuar. Ju lutem, ju them, na u largoni nga toka që e kemi të shenjtë nga të parët tanë, jemi shumë keq psikologjikisht."
Një tjetër banore shtoi: "Sot kemi ikur që në 06:00 të mëngjesit. Policët i kanë kapur njerëzit sikur janë kafshë." Ndërsa një protestuese tjetër bëri apel: "Po bëjmë 16 ditë që protestojmë. Policia na ka dhunuar, burra dhe gra dhe fëmijë. Ju lutem, ikni prej nesh, na u largoni nga toka jonë, toka e të parëve tanë. Ne nuk e lëshojmë tokën! Ju lutemi, ikni. Se do bëhet ndonjë kërdi e zezë prej rinisë tonë."
Banorët kërkojnë ndërhyrjen e autoriteteve për të garantuar respektimin e të drejtave mbi pronat e tyre dhe për të ndaluar projektin e resortit.