Banorët e fshatit Baks-Rrjoll në Shkodër u mblodhën pranë Drejtorisë Vendore të Policisë për të kërkuar lirimin e banorëve të shoqëruar nga policia gjatë protestave për çështjet e pronësisë. Sipas Ora News, numri i personave të shoqëruar arrin në 15.
Protestuesit shprehën se po kryhet padrejtësi në trajtimin e pretendimeve të tyre mbi pronat dhe kërkuan zgjidhje të menjëhershme nga institucionet përgjegjëse. Një prej tyre deklaroi se banorët do të vazhdojnë protestat nesër dhe pasnesër, duke theksuar se janë në të drejtën e tyre.
Në një prononcim për mediat, një protestues akuzoi autoritetet për falsifikim dokumentesh, bllokim të makinave dhe dhunë të ushtruar pa dallim moshe: “Na arrestojnë te toka, shkojnë atje sikur ua kemi zënë ne. [...] Këta kriminelë na trajtojnë se u kemi zënë ne tokat. Na bllokojnë makinat, kanë falsifikuar dokumentet. Nuk do të ndalemi, dhe do ta mbrojmë me çdo mënyrë. Do t’i drejtohemi gjykatave, SPAK-ut. I kapin prej leckash, nuk pyesin nëse janë pleq apo të rinj. Nuk është shteti që kemi ne, por ata që kanë paguar.”
Një tjetër protestues nuk i kurseu lotët, duke u shprehur se nuk do të ndalen derisa të fitojnë të drejtën e tyre. Situata mbetet e tensionuar, ndërsa banorët premtojnë të drejtohen te gjykatat dhe SPAK-u.