Kompania që po zhvillon projektin turistik në ishullin e Sazanit ka reaguar publikisht për herë të parë, mes debatit dhe protestave që kanë shoqëruar këtë investim. Përmes një postimi më 12 qershor në platformën X nga faqja Sazan Coast, drejtori i Sazan Real Estate Development LLC, Asher Abehsera, deklaroi se prej katër vitesh po punohet për krijimin e një destinacioni të klasit botëror në bregdetin shqiptar.
“Për katër vite kemi punuar për të krijuar një destinacion të klasit botëror, të bazuar në dizajn të kujdesshëm, mbrojtje të mjedisit dhe mundësi ekonomike afatgjata”, shkroi Abehsera. Sipas tij, objektivi është të festohet bukuria natyrore e Shqipërisë, të krijohen vende pune dhe të ndërtohet një aset për brezat e ardhshëm. Ai shtoi se e ardhmja e këtij projekti do të përcaktohet përfundimisht nga Shqipëria dhe shqiptarët.
Kjo deklaratë vjen në një moment kur projektet në Sazan dhe Zvërnec po përballen me kundërshtime qytetare. Më herët, në një komunikim për The Guardian, Abehsera theksoi se kompania respekton proceset publike dhe institucionale, duke u fokusuar te administrimi i përgjegjshëm dhe vlerat afatgjata për komunitetin.
Investimi ka marrë vëmendje të shtuar për shkak të përfshirjes së Ivanka Trump dhe bashkëshortit të saj, Jared Kushner, të cilët e kanë vlerësuar si një ndër projektet më ambicioze të karrierës së tyre. Nga ana tjetër, kryeministri Edi Rama ka garantuar vazhdimisht se ishulli i Sazanit do të mbetet pronë e shtetit shqiptar dhe nuk do t'i nënshtrohet procesit të privatizimit.